Pedhut Lelimengan

Cathetan Kahanan 2016/2017

PEMUT

(Sastra Lelana)

            Pedhut nggameng gumandhul ing wiyati sajak durung bisa sumilak yen durung ana maruta kandha aji. Ing bantala para kawula pada bingung golek teken, semono uga para punggawa praja padha iwut nggoleki kaluputan liyan.

                Wis wancine padha emut lan mawas dhiri supaya kahanan iki enggal dipungkasi. Para leluhur maringi sangu aji, jimat paripih ing Serat Tripama (tembang Dhandhanggula).

Katri mangka sudarmaning jawi

Pantes sagung kang para prawira

Amirida sakadare

Itung lelabuhanipun

Ajwa kongsi buang palupi

Menawa sibeng nista

Ing estinipun

Senadyan sekadhing buda

Tan prabeda budi panduming dumadi

Marsudi ing kotaman

                Ing tembang mau ngemutake marang sira kabeh tumpraping wong Jawa lan kawula Nuswantara, padha niru dalan kang bener ngabdi lan ngawula mring negara. Para punggawa praja aja pati-pati mbuwang patuladhan adi, pungkasane kajlungub ana ing jurang kanisthan.

                Kawula kabeh kudu andarbeni tekad ngabdi lan mbebela bumi kelahirane. Sadumuk bathuk sanyari bumi, rawe-rawe rantas, malang-malang putung, melu handarbeni, melu hangrukebi, mulat sarira hangrasa wani. Adohna saka sipat nabuh nyilih tangan, apa maneh rebut balung tanpa isi.

                Kapentingan bangsa lan negara luwih utawa katimbang kapentingan dhiri pribadhi lan golongan. Mung marga mbebela persatuane bangsa, kita kudu lila ngorbanake bandha, jiwa lan raga.