SESORAH

SESORAH

SEMANGAT NILAI-NILAI PERJUANGAN

Dening: Sastra Lelana

           

            Assalamualaikum wr. Wb.

Ngarsanipun para sepuh ingkang kinurmatan.

Para bapak saha para ibu pengembating praja Kadipaten Batang, ingkang tansah kawula dherekaken punapa ingkang dados aturan-aturanipun.

Panjenenganipun para juri ingkang kula kurmati, para bapak saha ibu peserta lomba utawi sayembara sesorah pidhato basa jawi, ingkang tansah kawula tresnani.

            Sakderengipun kawula matur wonten ing ngarsa panjenengan sami, sesarengan mangga kawula dherekaken nyaosaken raos syukur wonten ngarsa dalem Allah SWT. Ingkang sampun kepareng paring pinten-pinten rohmat lan hidayahipun ingkang arupi kesarasan, panjang umur, lan ugi kasempatan, saengga kula lan panjenengan saget pepanggihan kanthi wilujeng, mboten manggihi alangan satunggal punapa-punapa saperlu ndherek nguri-uri budaya jawi inggih punika lomba utawi sayembara sesorah basa jawi.

            Solawat lan salam mugi konjuk wonten ing ngarsanipun junjungan nabi agung Muhammad Rosulullah SAW. Mugi kula lan panjenengan tansah pikantuk safaat lan pitulunganipun mbenjang wonten ing ngalam akherat. Amin.

            Bapak saha ibu dewan juri lan sedayanipun para lenggah ingkang minulya.

Keparenga kula nami Sastra Lelana, badhe matur wonten ngarsa panjenengan, bab ngenani semangat nilai-nilai perjuangan.

            Semangat nilai-nilai perjuangan utawi patuladhan sikap lan perilaku para pejuang jaman rumiyin, katingal lan karaos saya dangu tan saya luntur. Saya dangu tan saya katilep saking gebyaring jaman sak mangke. Katitik wekdal sak menika para kaneman lan ugi kathah tiyang  ingkang nerak lan nrajang aturan utawi paugeran ingkang gumathok.

            Aturan lan tatanan negari kita ingkang awujud Pancasila, wekdal sakmangke kados-kados ketingal namung simbol kemawon. Pancasila nun inggih minangka dhasaring negari punika samangke saged dipun etang gunggunging tiyang ingkang sami nglampahi lan ugi ngamalaken isi lan kekandhutanipun Pancasila kala wau. Kathah warga lan rakyat ing negari Indonesia punika tindak- tandukipun.sami kemajon. Nrajang paugeran lan tatanan becik, remen kaliyan tindak lampahipun bangsa manca.

            Rasa kamanungsan sesamining gesang sampun karaos tipis sanget. Kathah kedadosan paten-pinatenan antawisipun sesamining gesang. Pradondi rajapati sajak sampun limrah kapireng saben dinten. Nggih nopo pak? 

Kathah lare ingkang tega nyedani tiyang sepuh. Kosok baline, kathah tiyang sepuh ingkang tega mrejaya lan mbucal larenipun piyambak.

Kathah tiyang tega ngapusi batire dhewek. Perbuatan korupsi pejabat tinggi, ngantos pejabat rendhahan, kados-kados lumrah sami nglampahi.

Mangga kita tansah emut dhawuhing tiyang sepuh duk ing nguni. “Aja sok kepengin barang kang melok, merga selak kepengin muluk”.

Tiyang sepuh sami wanti-wanti, aja sok kepengin mangan lan melik barang liyan punapa malih dhuwite rakyat, mung merga kepengin engal-enggal dadi wong sugih.

            Wong cilik ingkang kedahipun  dipun ayomi lan dilindhungi hak-hakipun malah dipun kebiri, lan dipun rampas.

Mangga kita kedah emut dhateng patuladhan lan conto saking Bapak Bupati Batang, nun inggih Bapak Yoyok Rio Sudibyo. Panjenenganipun sampun kathah perjuanganipun dhateng warganipun. Tegas anggenipun mimpin lan mbrastha koruptor. Dana kang kanggo nyekapi kabetahanipun lan hak-hakipun rakyat, tansah dipun etang kanthi premati, nyegah supados mboten bocor ing tengah margi.

            Dados pejabat publik mboten kepengin melik cepet sugih. Tansah berjuang supados tatanan pamarentahan saget tumata becik. Kemajuan dhaerah ugi dipun perjuangaken supados enggal tumata resik, becik, lan endah edi peni. Pramila mboten mokal, menawi panjenenganipun pikantuk penghargaan lan bebungah arupi “Bung Hatta Anti Korupsi Award”.

            Para lenggah lan sedayanipun para juri ingkang minulya.

Wekdal sak menika rasa persatuan lan kesatuan ugi tan saya wudar. Tiyang samangke gampil nesu, gampil tukaran lan memungsuhan. Seneng tindak culika. Karem sami nglampahi tindak Ma Lima, nun inggih Main, Madon, Madat, Minum, lan Maling. Sedaya punika kedah enggal kabucal lan dipun mareni. Monggo enggal nglampahi lan ngugemi Ma Lima nun inggih Manembah, Mituhu, Mikir, Makarya, lan Mawas dhiri.

Manembah, kedah sumuyud lan sregep anggenipun ngibadah.

Mituhu, kedah tansah  mituhu dhawuhing pamerentah, lan mituhu sedaya aturan.

Mikir, kedah sregep sinau, golek kapinteran lan wawasan.

Makarya, kedah sregep nyambut gawe, dadi wong jawa aja lelewa. Nanging seneng jaga wibawa

Mawas dhiri, lan tansah waspada marang tantangan, lan pacoban amarga saking ombaking jaman.

            Pramila mangga kita tansah saiyek saeko kapti. Mbangun negari, tansah njaga kawibawanipun dhasar negari Pancasila. Mugi negari kita tansah tulus widada. Saged enggal adil lan makmur baldatunthoyibatun warobun nghofur. Amin.

            Semanten saha mekaten ingkang saged kula aturaken, kirang langkungipun nyuwun pangapunten. Kanthi sesanti jaya wijaya wijayanti lebur dening pangastuti. Nuwun.

            Wassalamulaikum wr. wb.