Taman Geguritan

Bakrie

(Anggitan: Sastra Lelana)

Bakrie,

Duk semana uripmu kesrakat

duk semana drajatmu kurang murwat

ewasemono mangkat kerjamu ora nate telat

ndhidhik siswa kanthi tlaten, mugen, mulat.

Adoh saka pamrih munggah pangkat

sanadyan gajimu jarene sok disunat.

Bakrie,

Lelakon urip pancen nyakra manggilingan

Ing jaman iki, nasibmu wus karumat

Bebasan uripmu ora kurang pangan

Nanging, elinga marang Hyang Panguwasa Jagad.

Bakrie,

Saiki papanmu kadya kaum ningrat,

Sepedha onthelmu wus koganti rodha papat

Busanamu necis lir konglomerat

Nanging, elinga aja lali sodaqoh lan zakat.

Bakrie,

Saiki masyarakat padha meri,

Profesimu akeh kang pengin, antri

Ning kabeh durung ngerti

Yen kudu kotebus kanthi laku taberi.

Mula, sliramu kadya iwak ing njero kolam kaca

Kabeh tindak lampahmu padha diwaca

Welingku, aja urip bebas kaya wong manca

Nuruti karep, ngumbar nepsu lan dhahar eca.

Bakrie,

Saiki sliramu kudu sregep

Unggah-ungguh, muna-muni kudu ganep

Siswamu butuh teken kang teteg

Paringana sembur, wuwur, tutur kang trep

Murih dadya taruna mandhireng sigep

Mimpin kaprajan kanthi jejeg

Batang, Muharram 1434 H